Hoxe que vemos
de celebrar o Día Nacional de Galicia, o Día da Patria Galega, o Día da nosa
terra en definitiva, discútese por parte dos partidos nacionalistas a
atribución do sentimento galeguista, por algúns dise que só o BNG, ANOVA ou CxG,
son quen de defendelo, representalo e de abandeiralo. Pero non é certo, non é
patrimonio de eles; A galeguidade, a defensa de Galicia, a súa defensa, o
sacrificio para sacala adiante, reside soamente no pobo galego, en todos e cada
un de nos que formamos o corpo da nosa Comunidade Autónoma, do noso sono de
porvir compartido que representa a nosa cultura, o noso territorio, a nosa
idiosincrasia e o que é mellor, o noso presente e o camiñar fronte o noso
futuro.
Agora que
vivimos nun momento de fonda crise, non só no económico, senón tamén no social,
no político e tamén con moitos cantos de serea en contra das conquistas que
temos acadado dende a aprobación do noso Estatuto de Autonomía, das nosas
institucións e por ende da Constitución Española do 78 que prevé o estado das “nacionalidades”
como é a nosa histórica por mor da loita de moitos anos de intelectuais pero
tamén de xente de a pé, fito histórico os dos derradeiros 31 anos que non
podemos deixar retroceder, e non podemos renunciar a eles, os nosos devanceiros
leváronnos eiquí, e de eiquí segue o camiño. Eu dende logo vexo na Autonomía
non un problema senón unha oportunidade, unha realidade, e un proceso que na
nosa terra non pode ter volta atrás. A voz das galegas e os galegos por elo non
se pode apagar, nen agochar pero non a representan soamente os partidos enriba
ditos.
Unha cousa é
ser galego, outra ser nacionalista, outra ser centralista e incluso
independentista, pero nin uns son máis galeguistas, nin menos, por elo ninguén
é quen de apoderarse do alcume pero inda menos dun sentimento tan profundo e
noso. Ademais algúns dos mais sinalados devanceiros da nosa cultura e política
xa o tiñan dito. Pega a pena lembrar nestes intres o dito por Castelao, e
recollido na súa obra “Sempre en Galiza”, e cito textualmente: ”quero proclamar en letras de molde o que
diximos moitas veces nos mitins de propaganda.Creemos que o separatismo é unha
idea anacrónica e somentes o disculpamos como un movemento de desesperación que
endexamais quixéramos sentir. Esto significa que os defensores da posición
masimalista de Galiza non intentamos tronzar a solidaridade dos pobos hespañoes
–reforzada por unha convivencia de séculos- senón máis ben posibilitar a
reconstrucción da gran unidade hispana, ou ibérica.
Con total de que as nosas arelas federalistas se visen
comprendidas, Galiza cedería voluntariamente dos seus dereitos todo canto fose
indispensable para crear a soberanía do Estado hespañol; pero sendo demócratas
verdadeiros e arelando a unión fraternal de tódolos leaes, estamos dispostos a
ceder, tamén, da nosa posición doutrinal, canto sexa preciso para construirnos
o futuro benestar da nosa Terra. Frente a un separador sentímonos
intrasixentes, frente a un amigo sentímonos dispostos a pactar; frente a un
irmán somos capaces de ceder parte do noso ideario.”
Das verbas dun dos
máis grandes intelectuais galegos, despréndese baixo o meu punto de vista a
comodidade que sentira de viviren o proceso constitucional de 1978, o máis
parecido a un Estado de corte federal baixo a denominación de Autonomías, no
que conviven as nacionalidades e rexións sempre baixo o paraugas da solidaridade
entre todos os pobos que conforman o Estado. Non podemos dar as costas a
realidade ademais de estar en Europa co que elo representa, nun intre da nosa
historia no que a nova verba ven a ser a “globalización”. Pero esa realidade
non debe afastarnos do noso sentimento galego, non debe afastarrnos da defensa
do que nos é máis preto; porque a galeguidade non reside, como dixen, soamente
no territorio, senón que reside no corazón, na alma de todos os galegos independentemente
de onde atopémonos. O futuro está nas nosas máns, debemos pelexar arreo na
defensa do noso, porque facéndolo defendemos o de todos.
Para rematar
dicir só que eu son galego os 365 días do ano, que como galego tamén español,
como dicía o falecido Manuel Fraga “ser galego é a miña forma de ser español”,
hespañol que diría Castelao.
Viva Galicia
non soamente este 25 de xullo senón todos os días do ano.
No hay comentarios:
Publicar un comentario